ஒரு நாள் பயணமாக யாழ்ப்பாணம் முள்ளிவாய்க்கால் போன வைரமுத்தர் ஈழ காவியம் எழுதுவாராம்?

ஒருநாள் பயணமாக முள்ளிவாய்க்கால் போன பாட்டுக்கார வைரமுத்து ஈழ காவியம் எழுதுவாராம்?

 

படப் பாட்டுக்காரர் வைரமுத்து அவர்களுக்கு அதிகம் படிக்காத ஊர்க்குருவி மிகுந்த கவலையுடன் கொதிநிலையில் எழுதும் ஒரு உறைப்பான மடல்.

நான் எதையும் இட்டுக்கட்டி உங்கள்மீது போறாமை கொண்டு சேற்றை வாரி இறைப்பதற்காக இம்மடலை எழுத முன்வரவில்லை. அதற்கு எனக்கு நேரமும் இல்லை அப்படியான இயல்பும் எனக்கில்லை.

நீங்கள் இலக்கணத்திற்கு உட்படாமல் பத்து வரியில் ஒரு படத்துக்கு ஒரு பக்கம் பாட்டெழுதினால் பல இலட்சங்கள் கிடைக்கும், ஆனால் நான் பத்து இருபது பக்கங்கள் பரணி பாடினாலும் விற்பனைக்கு எழுதுபவனல்ல.

சமீபத்தில் நீங்கள் எழுதி படரவிட்ட ஒப்பாரி கவிதை ஒன்று ஆனந்த விகடன் இதழில் வெளிவந்ததாக குறிக்கப்பட்டு சமூக வலைத்தளங்களில் உலவ விடப்பட்டிருந்தது.

ஆறு ஆண்டுகள் காலங்கடந்து நீங்கள் எழுதி வெளியிட்ட அந்த ஒப்பாரியை படிப்பவர்கள் ஈழப்போரையும் அன்று ஈழப்போராட்டத்தை நசுக்கி அழிப்பதற்காக சூழ்ந்திருந்த பின்னணியையும் புரியாதவர்களாக இருக்கவேண்டும் அல்லது உங்களை தெரியாதவர்காளாக இருக்க வேண்டும்.

ஈழப்போர் உச்சத்தில் இருந்தபோது பதின்நான்கு பதினைந்து வயதாக வைரமுத்துவைப் பற்றி அறியாமல் இருந்தவர்கள்தான் இன்றைக்கு இருபது வயதாகி உங்கள் பின்னணி தெரியாமல் உங்களை வரவேற்பவர்களாக இருந்திருக்கின்றனர். நானும் எனது வயதை ஒத்தவர்களும் எனது மூத்தோரும்தானே உங்களையும் உங்கள் உள்ளுடன் அறிந்தவர்களாக இருக்கின்றோம். துரதிஷ்ட வசமாக நாங்கள் நாட்டில் வாழ முடியாமல் அகதியாக வெளியேறியது நீங்கள் முள்ளிவாய்க்கால்வரை சென்று செல்பி எடுத்து முகாரி ராகத்தில் ஒப்பாரிபாடி கொண்டாட முடிந்திருக்கிறது.

தமிழனாக ஒரு படைப்பாளி என்று கூறிக்கொள்ளும் நீங்கள் இனப்படுகொலை நடந்தபோது சார்ந்து பதுங்கியிருந்த இடம் எப்பேர்ப்பட்டது என்பதை அறியாதவர்கள் அந்த ஒப்பாரி வரிகளை உட்கார்ந்து உணர்ச்சி வசப்பட்டு கொதிநிலை அடையாமல் உண்மையான உங்கள் உள்ளக்கிடக்கைதான் அதுவென்று நினைத்து அப்பாவித்தனமாக சிலாகித்து படிக்க முடியும்.

எனக்கெல்லாம் இனப்படுகொலை என்ற வார்த்தையை யாராவது சொல்ல கேட்கும்போது 2009 போரின் கடைசி நாட்களை நினைக்கும்போது எங்கள் தோல்வியை நினைத்து நெஞ்சு கொதிக்கும்போதெல்லாம் ராஜ பக்‌ஷவோ சிங்களவனோ நினைவுக்கு வருவதில்லை மாறாக கருணாநிதியும் அவரது பரிவாரங்களான உங்களையும்தான் நான் மறக்காமல் நினைவு கூருகின்றேன.

உங்களைப்போன்ற வெகுஜன மதிப்பு பெற்ற காத்திரமான ஊன்றுகோல்களின் உதவி இல்லாமல் கருணாநிதியால் அன்றைக்கு ஈழத்தமிழினத்துக்கு எதிராக அவ்வளவு பெரிய மோசமான நிலையை எடுத்திருக்க முடியாது.

நீங்கள் மட்டுமல்ல சுப வீரபாண்டியன், வீரமணி, ரஜனிகாந்த், வாலி, இப்படி வெகுஜன கவர்ச்சி கொண்ட ஒரு பெரும் கூட்டம் கருணாநிதிக்கு அரணாக நின்றதன் விளைவு கருணாநிதியால் ஈழப்போராட்டத்தை அழித்து பெரும் இனப்படுகொலையை நிறுவ முடிந்தது,

அவரால் பல நாடகங்களை நியாயப்படுத்த முடிந்தது.

உங்கள் கவிதையை சமூக வலைத்தளங்களில் படித்தவர்களில் அனேகமானோர் படு மோசமாக தாறுமாறாக உங்களையும் உங்கள் கவிதையையும் விமர்சித்திருந்தனர். நீங்கள் அந்த விமர்சனங்களை கவனிக்காமல் இருந்திருக்க முடியாது.

வெளியே காட்டிக்கொள்ளாவிட்டாலும் ஏன் அந்தளவுக்கு நீங்கள் விமர்சிக்கப்பட்டீர்கள் என்பது உங்களுக்கு புரியாமல் இருப்பதற்கு நீங்கள் அவ்வளவு மக்கு கிடையாது.

உங்கள் புரிதலுக்காக நாம் தமிழர் கட்சியின் ஒருங்கிணைப்பாளர் சீமான் அடிக்கடி கூறும் ஒரு ஒப்புவமையை எடுத்துக்காட்டலாம் என்று நினைக்கின்றேன்.

இலங்கையில் ராஜபக்‌ஷவுடன் கூட்டாக சேர்ந்து நின்று போரை நடத்தி பல இலட்சம் மக்களை இனப்படுகொலை செய்தது இந்திய முன்னாள் மத்தியில் அதிகாரம் வகித்த சோனியா மன்மோகன்சிங் தலைமையிலான காங்கிரஸ் அரசு, அந்த அனீதியை தட்டிக்கேட்காமல் கண்மூடி மௌனமாக இருந்தது அப்போ எதிர்க்கட்சியாக இருந்த பாரதிய ஜனதா கட்சி ( பாஜக)

2007/ 2008/ 2009 களில் கடுமையான போரின்போது காங்கிரஸ் சர்க்காருக்கு சகல விதத்திலும் ஒத்துழைத்து குடும்பத்துக்கு பதவி சுகங்களை பெற்றுக்கொண்டு ஒரு பட்ட மரத்தின் இயல்போடு காங்கிரஸுக்கு பேருதவி புரிந்தவர் திமுக தலைவர் கருணாநிதியும் அவரது தலைமையிலான திமுக அரசும்.

சம காலங்களிலும் பின்னரும் கடலில் மீன்பிடிக்க சென்ற தமிழகத்து மீனவர்கள் பல நூற்றுக்கணக்கானோரை சுட்டுக்கொன்றது ஸ்ரீலங்கா இராணுவம், கடலில் எல்லை மீறினால் சுட்டுக்கொல்லுவோம் என்று இலங்கையின் ஆட்சியாளர்கள் மகிந்த ராஜபக்‌ஷ ,மற்றும் இந்நாள் பிரதமர் ரணில் விக்கிரமசிங்க ஆகியோர் பகிரங்கமாக பிரகடனம் செய்தனர் ஆனால் ஸ்ரீலங்கா இராணுவத்தை இராணுவ எதிர்வினைச் செயற்பாட்டு மூலமோ அல்லது அரசியல் ரீதியாகவோ காங்கிரஸ் அரசோ பாரதிய ஜனதா அரசோ ,மாறாக தமார்களின் தாய்மாமன் என்று சொல்லி ஆட்சி புரிந்துவந்த மாநில திமுக அரசோ எதிர்க்கவில்லை,

இந்த விடயங்களை பல அமைப்புக்கள் அரசியற் கட்சிகள் தட்டிக்கேட்டு தெருத்தெருவாக ஜனநாயக ரீதியில் பல போராட்டங்கள் நடத்தின அப்படியான வெகுசன போராட்டங்களை இந்திய ஆட்சியாளர்கள் எவரும் கண்டுகொள்ளவில்லை, நிலமை தீவிரமாகும் தருணங்களில் அப்போ ஆட்சியில் இருந்த மன்மோகன்சிங்காக இருக்கட்டும் இப்போ ஆட்சியிலுள்ள நரேந்திர மோடி ஆக இருக்கட்டும் கூறிக்கொண்ட நியாயம் ஸ்ரீலங்கா இந்தியாவின் உற்ற நண்பன் அவர்களுடன் முரண்பாடாக நடக்க முடியாது என்பதாகவே இருந்து வருகிறது.

இந்த இடத்தில் சீமான் வைக்கும் கேள்வி என்னவென்றால் ஸ்ரீலங்காவிலிருக்கும் சிங்களவன் என் இனத்தை சுட்டு கொல்லுகின்றான் அவன் இந்தியாவின் மத்திய சர்க்காரில் இருக்கும் உனக்கு நண்பனாக இருந்தால் ஒரு இந்திய குடிமகனாக இந்தியாவில் பிறந்து வளர்ந்து கடலில் தினம் தினம் கேட்பார் இல்லாமல் கொல்லப்படும் நாங்கள் யார்?

அப்படியானால் நீ எப்படி இந்த மண்ணில் பிறந்த எனக்கு பாதுகாவலனாக முடியும்? நீ எப்படி என்னை காத்தருளும் ஒப்பற்ற ஆட்சியாளனாக இருக்க முடியும்.

என்று சீமான் பல மேடைகளில் கேள்வி எழுப்பிவருகிறார். அது நியாயம் சத்தியம் என்றே மக்களும் சீமானை பின்தொடர்ந்து அணி திரளுகின்றனர்.

அதே கேள்வியைத்தான் நான் உங்களை நோக்கி வைக்கின்றேன், மத்திய ஹிந்தி சர்க்காருடன் இணைந்து எம்மை அழிக்க நாளொரு நாடகம் ஆடி அனைத்து சதிகளையும் அரங்கேற்றிய மேடைகளில் கருணாநிதியை தூக்கி நிறுத்தி பின்பாட்டு பாடிய நீங்கள் இன்று இரங்கல் கவி பாடியதன் பின்னணி நடக்கவிருக்கும் தேர்தலில் வீழ்ச்சியிலிருக்கும் கருணாநிதியை தூக்கி நிறுத்துவதற்கான அரசியலா அல்லது புதியவர்களின் வரவால் சினிமாவில் பாட்டெழுத சந்தற்பம் குறைந்துபோய் வறட்சியுற்றிருக்கும் சங்கடத்தை நிறைவு செய்வதற்காக பொற்கிழி வாங்கிப்போக வந்த கீழ்நிலையா?

உங்கள் கூட்டு சதியால் கொல்லப்பட்ட எனது உடன்பிறப்புக்களின் இடுகாட்டில் நின்று இன்றைக்கு நீலிக்கண்ணீர் வடித்து முகாரி பாடி பணமுடிச்சு பெற்று போகும்போது உங்களுக்கு கூச்சமாக இருக்கவில்லையா.

எனக்கு புரியவேயில்லை தமிழ்நாட்டின் பாமர மக்களால்த்தான் எங்களுக்கு பலமும் தமிழ்நாட்டின் அரசியல் சினிமா வியாபாரிகளால்த்தான் எங்கள் துயரமும் இரண்டறக்கலந்து இருக்கிறது. இது உங்களால் எப்படி வைரமுத்து முடிகிறது.

உங்களை நான் ஒரு காலத்தில் மறைந்த கவியரசு கண்ணதாசனின் இடத்தை நிரப்பவந்த ஒரு ஆளுமையாக கற்பனை பண்ணியதுண்டு, பின் ஒரு காலத்தில் பறவை முனியம்மாவின் பாடலின் தரத்தில் உங்கள் பாடல்களை கண்டு ஏதோ நடக்கட்டும் என்ற மனநிலையுடன் பார்த்ததுமுண்டு. இப்போ நீங்கள் முள்ளிவாய்க்கால் செல்வதற்கு பணம் பெற்றுக்கொண்டதாக அறிந்தபோது உங்கள் வறுமைநிலை உங்களை தரை மட்டத்துக்கு இறக்கிவிட்டதை எண்ணி வருந்தியதுமுண்டு.

அடுத்து நீங்கள் ஈழ காவியம் எழுதப்போவதாக ஒரு வதந்தி உலவுகிறது. அது உண்மையாக இருக்க முடியாது என்றுதான் நான் நினைக்கிறேன் ஏனெனில் அங்கு பிறந்து வளர்ந்த என்போன்றவர்களுக்கே ஈழ வரலாறு முழுவதும் புரியாதபோது ஒருநாள் பயணமாக யாழ்ப்பாணம் மற்றும் முல்லைத்தீவு சென்று வந்த உங்களால் ஈழம் பற்றி ஒரு கற்பனை காவியத்தை த்தான் படைக்க முடியும்.

வந்தேறியான சிங்களவன் மகாவம்ஷம் என்ற பெயரில் ஒரு வரலாற்று திரிவு ஒன்றை எழுதி அதை வரலாறாக்கியதுபோல உங்கள் காவியமும் ஈழ மக்களுக்கு சிக்கலாகிவிடக்கூடாது என்பது எனது கருத்து.

ஊர்க்குருவி.

சம்பந்தர், மாவை தரப்பின் மாகாணசபை மீதான முரண்பாடு வித்தியாசமான வேறு ஒரு தலைமையை உருவாக்கக்கூடும்..

இத்தால் சகல ஈழ தமிழர்களுக்கும், ஈழத்தின் அடிமை தழையை உடைத்தெறிந்து விடுதலையை நோக்கிய சிந்தனையுடன் பயணம்செய்யும் செயற்பாட்டாளர்கள் அனைவருக்கும் சொல்லிக் கொள்ளுவது என்னவென்றால்.

இலங்கை சுதந்திரத்தின் பின் தந்தை செல்வநாயகம் அவர்களால் உருவாக்கப்பட்டு அர்ப்பணிப்புடன் தமிழினத்துக்காக பிறந்து வளர்ந்து போராடிய கட்சி “இலங்கை தமிழரசு கட்சி”

தேசியத் தலைவர் மேதகு வேலுப்பிள்ளை பிரபாகரன் அவர்களால் ஒரு இக்கட்டான தருணத்தில் மிகுந்த மென் இழை ராஜதந்திர நோக்கோடு தொலைநோக்குப் பார்வையுடன் உருவாக்கம் பெற்று சர்வதேச அங்கீகாரத்தை தன்னகத்தே கொண்ட தமிழர்களின் தேசிய கட்சி “தமிழ் தேசியக்கூட்டமைப்பு”, இந்த இரண்டு கட்சிகளையும் உருவாக்கியதில் அல்லது வளர்த்ததில் சம்பந்தனுக்கு மாவை சேனாதிராசாவுக்கு துளியளவு பங்கும் இல்லை. என்னைப்போல உங்களைப்போல சம்பந்தனும் மாவையும் தமிழ் உணர்வுடன் இருந்து இருந்தாலும் கூடுதலாக இந்த இருவரும் குறிப்பிட்ட அமைப்புக்களின் உறுப்பினர்களாக இருந்தவர்கள் என்ற ஒன்று மட்டுமே கூடுதல் தகுதியாக கொள்ள முடியும்.

விரால் மீன் இல்லாத குளத்தில் குறவை மீன் துள்ளி விளையாடுவதுபோல தமிழரசு கட்சியையும் தமிழ் தேசிய கூட்டமைப்பு கட்சியையும் தந்தரமாக சுவீகாரம் செய்து அக் கட்சிகளின் நிழலில் இன்று இன்புற்று வாழ்பவர்களாக இரா சம்பந்தன், மற்றும் சுமந்திரன், மாவை சேனாதிராசா மற்றும் சிலர். எந்த ஒரு குறிக்கோளும் இல்லாமல் சுயநலனே குறியாக துரோக அரசியல் செய்து பொழுது போக்கிக்கொண்டு இருக்கின்றனர்.

இரா சம்பந்தன் அவர்கள் தான் இன்றைக்கு என்ன செய்கிறேன் என்பதே தெரியாமல் ஒரு கோமா நோயாளிபோல சுமந்திரனின் வாய்ப்பாட்டை மட்டுமே தினமும் கேட்டு, வரத்து தண்ணீருடன் அடிபட்டு செல்லும் கிணற்று நீர்போல் சகதி, சாக்கடை, கழிப்பிடங்களை நோக்கி தாந்தோன்றித்தனமாக பாய்ந்து ஓடிக்கொண்டிருக்கிறார். பின்னால் சுமந்திரன் மாவை ஆகியோர் சன்பந்தன் கை பிடித்து திக்கு தெரியாத ஒரு திசை நோக்கி செல்லுகின்றனர். இவர்களுடன் ஒன்றி கலந்து பயணப்பட்ட வடக்கு மாகாண முதலமைச்சர் விக்கினேஸ்வரன் மாறிவரும் மக்களின் மனவோட்டத்தை உணர்ந்து சம்பந்தன் தரப்பினரிடம் இருந்து சற்றே விலகி யதார்த்தத்தை புரிந்து கொண்டு தனது பார்வையையும் பாதையையும் மாற்றி அமைக்க முற்பட்டிருக்கிறார்.

பாராளுமன்ற பிரதிநிதுத்துவம் என்ற செல்வாக்கை வைத்துக்கொண்டு தமிழர்களின் அரசியல் பொருளாதார வாழ்வியலை தமது சுயநல கைப்பிடிக்குள் வைத்து எதுவும் செய்துவிடலாம் என்பது சம்பந்தன் குழுவினரின் கொள்கையாக இருந்து வருகிறது. சம்பந்தன் குழுவினரின் குடிமியை பிடித்து தொங்குவதால் வடக்கு மாகாணசபை உறுப்பினர்களின் பொல்லாப்புக்குள்ளாகி மக்களின் வெறுப்பை சம்பாதித்து முகவரி இல்லாமல் போய்விடுவோமோ என்ற யதார்த்தம் அறிந்து சூழல் அசைவாக்கத்தை பின்பற்றவேண்டிய நிலையை உணர்ந்தவராக முதலமைச்சர் விக்னேஸ்வரன் மாற்றம் பெற்றிருக்கிறார்.

சென்ற ஆண்டு எந்த கூச்ச உணர்வுமில்லாமல் ரணில் விக்கிரமசிங்கவை ஒரு கையிலும் சிங்க கொடியை இன்னொரு கையிலும் புளகாங்கிதத்துடன் தலைக்குமேல் தூக்கி இனத் துரோகியாக மாறிப்போய்விட்டவர் சம்பந்தன், இதன் பின்னணியில் கொழும்பு பிறப்பினரான சுமந்திரன் மற்றும் விக்னேஸ்வரன் இருந்ததாக உலகதமிழர்கள் மத்தியில் மோசமாக விமர்சனம் எழுந்தது.

இன்றைக்கு மகிந்த ராஜபக்‌ஷவின் ஒரு பிரிவினர் ராஜபக்‌ஷவை ஓரங்கட்டி ஒதுக்கிவிட்டு மைத்திரிபால ஶ்ரீசேன தலைமையில் புதிய மொந்தையில் அதே பழைய கள்ளை வைத்து புதிய அரசாங்கம் என்று விடுப்புக்காட்டி ஒரு ஆட்சியும் நடந்து வருகிறது அந்த அரசாங்கத்தின் நிலைப்பாட்டை வழிமொழிந்து பின்பற்றுவதன் மூலம் மாகாணசபையின் அசைவாக்கத்தை தமது பிடிக்குள் வைத்திருக்கவேண்டும் என்பதே சம்பந்தர் மாவை ஆகியோரின் குறியாக இருந்து வருகிறது.

போராட்டம் நிறுத்தப்பட்ட இன்றைய காலகட்டத்தில் பாராளுமன்ற அரசியற் கட்சிகள் என்னதான் ஆட்டம் ஓட்டம் போட்டாலும் இறுதியில் அதிகாரம் சங்கமமாகும் புள்ளியாக மாகாண சபை நிர்வாகமே மேலோங்கி நிற்கிறது, மாகாணசபையின் அசைவு ஒன்றுதான் தமிழர்களின் அடிப்படை இருப்பை தீர்மானிக்கும் இடமாக இருப்பதால் பாராளுமன்ற பிரதிநிதுத்துவத்தை விடவும் முன்னிலை வகிப்பது மாகாண சபையின் தீர்மானங்களும் வேலைத்திட்டங்களும் என்பதாகவே மக்களின் பார்வை மாற்றம் பெறத்தொடங்கிவிட்டது.. இந்த இடத்தில்த்தான் பாராளுமன்ற பிரதிநிதுத்துவமா மாகாணசபையின் ஆளுமையா என்ற கேள்வி அரசியல்வாதிகளிடம் போட்டியாக பூதாகரமாக எழும்பி நிற்கிறது.

அந்த ஈகோவின் வெளிப்பாடுதான் மாவை சேனாதிராசா விக்கினேஸ்வரன் மீது தொடுத்து நிற்கும் பகமை என்பதை புரிந்து கொள்ளலாம்.

வடக்கு மாகாண முதலமைச்சராகிவிட வேண்டுமென்ற பெரும் கனவிலிருத்த மாவை, கொழும்பிலுள்ள இந்திய தூதர் கொடுத்த அழுத்தத்தால் அந்த கனவு பதவியை துறக்கவேண்டிய நெருக்கடி ஏற்பட்டிருந்தது,

இருந்தும் மாகாண சபையை தமது கட்டுப்பாட்டிலிருந்து விடுபட்டு தன்னிச்சையாக செயற்படுவது என்பது சம்பந்தன் மாவை சுமந்திரன் என்ற மூவர் குழுவினரால் மனதளவில்க்கூட அனுமதிக்க முடியவில்லை. மாகாணசபையின் பெரும்பாலான உறுப்பினர்களின் நோக்கம், உலக தமிழர்களின் எதிர்பார்ப்பு இவைகளுக்கு உட்பட்டு இனப்படுகொலைக்கு எதிரான தீர்மானம் மாகாணசபையில் முதலமைச்சர் விக்னேஸ்வரன் அவர்களால் நிறைவேற்றப்பட்டது.

அந்த தீர்மானம் சர்வதேச அரங்கில் பெருத்த தாக்கத்தை ஏற்படுத்தியதோ இல்லையோ சம்பந்தன் தரப்புக்கு நெருப்பு சுட்ட வேதனையை தோற்றுவித்துவிட்டதை கண்கூடாக காணுகின்றோம்.

விக்னேஸ்வரன் தலைமையிலான மாகாணசபை தன்னிச்சயாக செயற்படுவது புதிய ரணில், மைத்திரி அரசுக்கு எவ்வளவு நெருக்கடியோ அவ்வளவு வெறுப்ப்பு மூவர் குழுவுக்கும் இருந்து கொண்டே இருக்கிறது.

சமீபத்தில் வடபகுதிக்கு விஜயம் செய்த ஶ்ரீலங்கா பிரதமர் ரணில் விக்கிரமசிங்கவின் ஒன்று கூடலில் முக்கியமாக கவுரவப்படுத்த வேண்டிய வடக்கு மாகாண சபைக்கும் முதலமைச்சர் விக்கினேஸ்வரன் அவர்களுக்கும் சம்பிரதாயத்துக்குகூட அழைப்பு அனுப்பப்படவில்லை. மாகாணசபை உறுப்பினர்கள் எவரும் ரணிலின் வரவேர்பில் சங்கமமாகவும் இல்லை. மாவை சேனாதிராசா சுரேஷ் பிரேமச்சந்திரன், சரவணபவன் போன்றோர் கலந்து கொண்டு எதுபற்றி பேசினர் என்பது புரியாத புதிராக இருந்தாலும் இந்த ஒன்று கூடலின் மூலம் மாகாணசபையை மட்டம் தட்டிவிட்ட பெருமை தற்காலகமாக திருப்தியளித்தாலும் சம்பந்தன் ரணில் குழுவினருக்கும் மக்களாகிய தமக்கும் இடையே ஒரு கறுப்பு திரை விழுந்துவிட்டதாகவே விமர்சனங்கள் பெருகி வருகின்றன. .

இப்போ சம்பந்தன் தரப்பு மூன்று நான்கு அமைச்சர் பதவிகளை ரணில் அரசிடம் கேட்டு கையேந்தி நிற்கின்றனர் என்று தெரிய வருகிறது. மத்தியில் உள்ள அமைச்சர்கள் மூலம் மாகாணசபைக்கு கொடுக்கும் அதிகாரங்களை மட்டுப்படுத்தி மத்திய அரசாங்கத்திடம் தமிழர்களுக்கான அதிகாரங்களை பெறும் இடமாக பாராளுமன்ற பிரதிநிதுத்துவம் இருக்கவேண்டும் என்றும் அதன்மூலம் மாகாணசபையை தமது விருப்பத்துக்கு ஆட்டி வைக்கலாம் என்பதே மிகப்பெரிய இராஜ தந்திரமாக சம்பந்தன் மாவை தரப்பால் வலை பின்னப்படுகிறது.

சட்டம் படித்த முன்னாள் நீதியரசரான முதலமைச்சர் விக்னேஸ்வரன் மக்கள் பலத்துடன் இருப்பதால் சம்பந்தன் தரப்பினரின் சில்லறை தனமான இந்திய தரத்திலாலான அரசியல் நரி இராஜதந்திரம் அடிபட்டுப்போகும் என்றே உணரக்கிடைக்கிறது. இவர்களது ஈகோ தொடரும் பட்ஷத்தில் வடக்கே மக்கள் நலனுக்காக தொடர்ந்து போராடி வரும் கஜேந்திரகுமார் பொன்னம்பலம் அவர்களின் தலைமையிலான “தமிழ்த் தேசிய மக்கள் முன்னணி” சிவாஜிலிங்கம் சார்ந்த கட்சிகள் இணைந்து விக்னேஸ்வரன் தலைமையில் ஒரு புதிய அமைப்பு உருவாக்கி மக்கள் செல்வாக்குடன் பாராளுமன்ற பிரதிநிதுத்துவத்தையும் கைப்பற்ற முயற்சியும் செய்யலாம். வெற்றியும் பெறலாம் என்பதே நிதர்சனமாகும். சமீபத்தில் ஒரு நேர்காணலின்போது வடக்கு மாகாண முதலமைச்சர் விக்கினேஸ்வரன் அவர்கள் கூறும்போது நான் தமிழரசுக்கட்சி உறுப்பினனல்ல. அதனால் மாவையோ எவருமோ அக்கட்சியிலிருந்து என்னை நீக்கமுடியாதென தெரிவித்துள்ளார் என்பதும் இங்கு நினைவு கூறத்தக்கது.

ஈழதேசம் செய்திகளுக்காக.

கனகதரன்.